Eze 14 | NdeIBE | STEP | Abanye babadala bako-Israyeli beza kimi bahlala phambi kwami.

Ezekiel 14

Abakhonza Izithombe Bayasolwa

1 Abanye babadala bako-Israyeli beza kimi bahlala phambi kwami. 2 Ilizwi likaJehova laselifika kimi lisithi: 3 “Ndodana yomuntu, abantu laba sebebeke izithombe ezinhliziyweni zabo bafaka lezikhubekiso ezimbi phambi kobuso babo. Ngibavumele ukungibuza na?

4 Ngakho khuluma labo ubatshele uthi, ‘Nanku okutshiwo nguJehova Wobukhosi: Lapho loba nguwuphi um-Israyeli ebeka izithombe enhliziyweni yakhe, afake lesikhubekiso esibi phambi kobuso bakhe abesesiyaphrofetha, mina uJehova ngizamphendula mina ngokwami ngokuhambelana lokukhonza kwakhe izithombe okukhulu. 5 Ngizakwenza lokhu ukuze ngizibambe futhi izinhliziyo zabantu bako-Israyeli asebengidelile bonke ngenxa yezithombe zabo.’

6 “Ngakho-ke tshono endlini ka-Israyeli uthi: ‘Nanku okutshiwo nguJehova Wobukhosi: Phendukani! Tshiyani izithombe zenu lilahle imikhuba yenu enengayo!

7 “ ‘Lapho um-Israyeli loba omunye wabezizweni ohlala ko-Israyeli ezehlukanisa lami abeke izithombe enhliziyweni yakhe njalo afake lesikhubekiso esibi phambi kobuso bakhe abesesiyaphrofetha ebuza kimi, mina Jehova ngizamphendula mina ngokwami. 8 Ngizamelana lalowomuntu ngobuso bami njalo ngimenze isibonelo kanye lesiga. Ngizamsusa ebantwini bami. Lapho-ke lizakwazi ukuthi nginguJehova.

9 “ ‘Njalo uma umphrofethi ekhohliseke ukuba akhulume isiphrofetho, mina uJehova yimi engikhohlise umphrofethi lowo, njalo ngizakwelula isandla sami ngimelane laye ngimbhubhise phakathi kwabantu bami u-Israyeli. 10 Bazathwala icala labo – umphrofethi uzakuba lecala njengalowo ombuzayo. 11 Laphoke abantu bako-Israyeli kabasayikungifulathela kumbe bazingcolise futhi ngazo zonke izono zabo. Bazakuba ngabantu bami, mina ngibe nguNkulunkulu wabo, kutsho uJehova Wobukhosi.’ ”

Ukwahlulela Akubalekelwa

12 Ilizwi likaJehova lafika kimi lisithi:

13 “Ndodana yomuntu, uma ilizwe lisona kimi ngokungathembeki besengiselula isandla sami ukuba ngivale ukulethwa kokudla kwalo, ngithumele indlala kulo ibulale abantu bakhona kanye lezifuyo zabo, 14 lanxa amadoda amathathu la – uNowa, loDanyeli kanye loJobe – angabe ayekhona kulo, ayezazihlenga wona kuphela ngokulunga kwawo, kutsho uJehova Wobukhosi.

15 “Loba uma ngingathuma izilo zeganga ukuba zidabule phakathi kwalelolizwe zilitshiye lingaselabantwana njalo libe lugwadule okwenza kungabi lamuntu odlula phakathi kwalo ngenxa yezilo, 16 ngeqiniso elinjengoba ngikhona, kutsho uJehova Wobukhosi, lanxa amadoda la amathathu engabe ayekhona kulo ayengeke awahlenge amadodana awo kumbe amadodakazi. Wona kuphela yiwo ayengahlengwa, kodwa ilizwe lalizachitheka.

17 “Loba uma ngingaletha inkemba imelane lalelolizwe ngithi, ‘Inkemba kayidlule phakathi kwelizwe lonke, ngibulale abantu kanye lezifuyo zabo, 18 ngeqiniso elinjengoba ngikhona, kutsho uJehova Wobukhosi, lanxa amadoda la amathathu kungabe ayekulo, ayengeke awahlenge amadodana awo kumbe amadodakazi. Wona kuphela yiwo ayengahlengwa.

19 “Loba uma ngithumela isifo kulelolizwe ngithululele ulaka lwami phezu kwalo ngokuchithwa kwegazi, sibulale abantu balo kanye lezifuyo zabo, 20 ngeqiniso elinjengoba ngikhona, kutsho uJehova Wobukhosi, lanxa uNowa, loDanyeli kanye loJobe bengabe bekulo bebengeke bahlenge indodana kumbe indodakazi. Bebengazihlenga bona kuphela ngokulunga kwabo.

21 “Ngoba nanku okutshiwo nguJehova Wobukhosi: Kuzakuba kubi kakhulu okunjani na lapho sengithumela eJerusalema izahlulelo zami ezine – inkemba lendlala lezilo zeganga kanye lesifo ukuba kubulale abantu balo kanye lezifuyo zabo! 22 Kodwa kuzakuba labanye abasilayo – amadodana lamadodakazi abazakhutshelwa ngaphandle kwalo. Bazakuza kuwe, njalo lapho ubona ukuziphatha kwabo lezenzo zabo, uzaduduzeka ngomonakalo engiwehlisela phezu kweJerusalema – wonke umonakalo engawehlisela phezu kwalo. 23 Uzaduduzeka lapho usubona ukuziphatha kwabo kanye lezenzo zabo, ngoba uzakwazi ukuthi angenzanga lutho phakathi kwalo kungekho sizatho, kutsho uJehova Wobukhosi.”